Wann da á Kammertür zuafallt
und wird’s ámoi vá drin her kalt,
aft wird’s á traurig’s Lebm.
Guat, daß má sih da helfm kann,
wann oan wer braucht und klopft wer an
muaß má eahm Einlaß gebm.
Weihnachtsfreuden

Wia a Joahr so schnell vergeht,
iatzt is wieda mal so weit.
Der Schnee is do, da Frost, de Költn
und d’ wunderschene Weihnachtszeit.

Da gibt’s a Duschln und a Kroamma,
ganz hoamli muaß ois geh,
jung und alt is scho ganz aufgregt
und des is do gar so sche.

Und wann ma dann vorm Christbam stehn
mit unsre Enklkinda,
glanzn uns de Augn genau a so
und de Freud is a net minda.

Und macht ma dann de Packerl auf,
is d’Neugier glei erwacht,
mir fragen genau so wia de Kinder
„was hat uns ‘s Christkind bracht?“

Und wann ma dann in d’Mettn gehen
leucht uns a heller Stern
und a freudigs Glockngläut
kündt uns de Geburt des Herrn.